Undanfarin ár hafa unglingarnir í æskulýðsfélagi Hofsprestkalls – Kýros - á Vopnafirði vakið athygli fyrir frumkvæði og dugnað. Þar stendur hæst Vinavikan á haustin og nú ætla unglingarnir að standa fyrir æskulýðsmessu og árlegri kaffisölu. Messan verður með nýstárlegu sniði með áherslu á fjölbreytt tónlistar-og leikatriði á léttum nótum með gleðina í fyrirrúmi, þar sem margir koma fram ásamt kirkju-og barnakórnum.  Þema dagsins er „Gerið gleði mína fullkomna“ og munu unglingarnir skreyta kirkjuna og safnaðarheimilið  í takt við það með blöðrum, brosköllum og litríkum borðum.

 Eftir messu verður árleg kaffisala æskulýðsfélagsins í safnaðarheimili Vopnafjarðarkirkju.  Allur ágóðinn af kaffisölunni rennur óskiptur til hjálpar þrælabörnum á Indlandi. Málefnið völdu unglingarnir og þau sjá um allan undirbúning fyrir messuna og kaffisöluna og leggja mikið að mörkum.

 Með framtakinu finna unglingarnir, að þau geta haft áhrif til góðs með með því að láta til sína taka, auðgað mannlífið á Vopnafirði og glætt von um betri heim og bjarta framtíð.