Þeir Birkir og Einar komu og gerðu það góðverk að þvo gluggana hjá okkur.

Sverrir Hrafn var að þvo bíla við safnaðarheimilið

Boðið var upp á vöfflur með rjóma

Kamilla Huld og Íris málaðar í framan.

« 1 af 10 »

Vinavika var á Vopnafirði á vegum æskulýðsfélags Hofsprestakalls og lauk í gær með kærleiksmaraþoni æskulýðsfélagsin Hofsprestakalls og guðsþjónustu í Vopnafjarðarkirkju þar sem unglingarnir tóku virkan þátt.

Unglingarnir stóðu fyrir ýmsum viðburðum sem minntu á gildi vináttu og kærleika. Fyrirtæki voru skreytt, íbúar fengum óvænt skilaboð að morgni dags, farið var í fjölmenna skrúðgöngu og á föstudaginn aðstoðuðu unglingarnir fólk við verslunarinnkaup, gáfu barmerki sem á stóð „Ég er vinur" og föðmuðu fólk. Það er óhætt að segja að margir hafi hreinlega bráðnað í faðmi krakkanna.

 Vikunni lauk með árlegu kærleiksmaraþoni sem fólst í því að ganga í hús og bjóða fram aðstoð sína við heimilisverkin. Þá var opið hús í safnaðarheimili Vopnafjarðarkirkju, þar sem boðið var upp á vöfflur, kaffi og djús - allt ókeypis. Fólki gafst kostur að láta þvo bílana sína og börnin fengu andlitsmálun.
 

Í guðsþjónustunni tóku unglingarnir virkan þátt og buðu svo öllum upp á spaghettí og brauð á eftir. Við upphaf guðsþjónustuna var lesin kveðja frá biskupi Íslands, sr. Karli Sigurbjörnssyni, þar sem hann þakkaði unglingum fyrir vinavikuna og framlag þeirra og að minna okkur á hin sönnu verðmæti lífsins vináttuna og kærleikann, umhyggjuna og gleðina á tímum þegar mikil reiði, sorg og óvild er í samfélagi okkar hér á Íslandi (sbr. neðangreint). Á annað hundrað manns komu í kirkjuna og nutu vináttu með unglingunum og góðgjörða þeirra


Kveðja frá biskupi Íslands sr. Karli Sigurbjörnssyni



Kæru vinir í Vopnafirði. Þakka ykkur fyrir vinavikuna! Frásagnirnar af
vinavikunni sem ég hef heyrt og lesið í  fjölmiðlum, hafa hrifið mig og svo
marga um land allt og borið okkur öllum svo hlýju, birtu og von. Ég vil
þakka þetta frábæra framtak æskulýðsfélags kirkjunnar og sóknarprestsins og
þeim mörgu sem hafa tekið undir með þeim og stutt þau með ráðum og dáð til
að bera boðskapinn og áhrifin áfram út í samfélagið.  Það er ómetanlega
dýrmætt að vera minntur á hin sönnu verðmæti lífsins vináttuna og
kærleikann, umhyggjuna og gleðina. Það hafið þið gert með framtaki ykkar.

Það er mikil sorg, reiði og óvild í samfélagi okkar hér á Íslandi. Vinátta
er vegur til friðar og sáttar, vegna þess að vinátta byggir á trausti. Á
tímum sífellt yfirborðslegri samskipta er vinátta ekki auðfundin. En sönn
vinátta er lækning við kaldhæðni sem er andstæða trúar og vonar. Mál vináttu
og kærleika skilja allir, það rýfur hindranir ótta, tortryggni og fyrirvara.
Látum það mál og áhrif berast á milli okkar og til allra sem á vegi okkar
verða.
Guð blessi ykkur öll, kæru vinir.

Karl Sigurbjörnsson.


Með framtaki sínu hafa unglingarnir sýnt með áþreifanlegum hætti gildi
vináttunnar og kærleikans og á Vopnafirði höfum við fundið orð Páls postula
rætast:  „Því nú varir trú, von og kærleikur, en þeirra er kærleikurinn
mestur." (Kor. 13:13)
kær kveðja,



Stefán Már Gunnlaugsson

sóknarprestur Hofsprestakalls