Unnið að lausn vegna frárennslismála
Ákveðin vandamál hafa komið upp vegna frárennslis frá uppsjávarfrystihúsi HB Granda á Vopnafirði. Stjórnendur félagsins hafa fengið verkfræðistofuna EFLU til þess að gera úttekt á frárennslis- og mengunarmálum með það að markmiði að leysa vandamálið til frambúðar. Vinnslustöðvun í byrjun vikunnar var að fullu nýtt til að endurbæta og lagfæra núverandi búnað og eins má nefna að nú þegar er hafin hreinsun á fjörum í samvinnu við og undir stjórn Vopnafjarðarhrepps.
Vegna þessa hefur HB Grandi sent út yfirlýsingu og afsökunarbeiðni til íbúa á Vopnafirði og hefur bréf þar að lútandi verið borið út í öll hús á staðnum. Undir bréfið ritar Vilhjálmur Vilhjálmsson, deildarstjóri uppsjávarsviðs HB Granda:
,,Í sumar hefur viljað brenna við að fita og grútur frá starfsemi félagsins á Vopnafirði hafi borist í fjörur staðarins. Grútarmengunin hefur valdið íbúum Vopnafjarðar óþægindum og biðst félagið velvirðingar á því.
Ástæða þess hafa verið bilanir í búnaði, dælum o.þ.h. og að frárennsli var mun meira en menn áttuðu sig á. Þrátt fyrir að ýmislegt hafi verið gert til að hemja frárennslislögn virðist sem enn og aftur leiki endi hennar lausum hala.
Það hefur aldrei verið unnið annað eins magn af síld og makríl í uppsjávarfrystihúsinu og nú í sumar. Nú er t.d. búið að frysta rúm 7.500 tonn af afurðum á móti 1.200 tonnum í fyrra. Við þessa vinnslu er að falla til gífurlegt magn af fitu og hafa tæki okkar og úrræði greinilega ekki verið nægilega viðbúin því.
Við munum gera það sem í okkar valdi stendur til að koma fráveitumálum okkar í fyrirmyndarlag. Nú er verið að auka afköst dælingar og fituhreinsunar í vinnslunni. Við erum að láta kafa með útrásarlögninni og munum koma henni í lag.
Við höfum í samvinnu við og undir forystu sveitarfélagsins hafið hreinsun í fjörunni.
Við höfum falið verkfræðistofunni EFLU að gera úttekt á fráveitumálum okkar, útrás og fituhreinsun og óskað eftir því að þeir hefji vinnu við verkið sem allra fyrst.
Við biðjum íbúa Vopnafjarðar enn og aftur afsökunar á þessu. Við munum gera allt sem í okkar valdi stendur til að koma fráveitumálum okkar í fyrirmyndarlag og hraða því ferli eins og hægt er."
Fleiri fréttir
- 13. desember 2019
Mikil vinna við að koma rafmangi á að nýju á norðausturlandi. - 11. desember 2019
Veður skaplegt á Vopnafirði. - 03. desember 2019
Hiti í byrjun aðventu - 28. nóvember 2019
Síðustu geislar sólar þetta árið. - 23. nóvember 2019
Að veiða eða veiða ekki. - 22. nóvember 2019
Fært yfir Selá - 14. nóvember 2019
Rjúpan friðuð á Vopnafirði. - 13. nóvember 2019
1800 tonn af fiskmjöli send í pokum frá Vopnafirði til Canada. - 22. september 2016
Venus aflahæsta skip flotans - 05. júní 2016
Gleðilegan Sjómannadag. - 18. mars 2016
Árshátið Vopnafjarðarskóla 2016 - 31. janúar 2016
Unglingadeild Vopna - 03. október 2015
Tveir í "slipp" - 26. ágúst 2015
Skjólfjörur í Vopnafirði - 07. ágúst 2015
Leifarnar af göngubrúnni teknar niður.